Be’e mos ho saneamento iha ligasaun ho SDG (Objetivus ba Dezenvolvimentu Sustentavel) numeru 6 no Governu Timor-Leste agora dadaun halo hela servisu hodi fornese be’e mos ho saneamento ba sidadaun. Ligadu ho ida ne’e mos, Governu hahú ona ho planu mestre ba cidades balun. Liu hosi enkontru ho konsultasaun hamutuk ho stakeholders hanesan Be’e Timor-Leste (BTL, E.P) no Autoridade Nasional ba Aguas ho Saneamento (ANAS, I.P), Ekipa Programa PPI[1] hala’o atividade vizita de terrenu iha Munisipiu 6 (nein) hosi loron 4 fulan Janeiro to’o loron 9 fulan Fevereiro tinan 2022 ho total loron servisu hamutuk 18. Fatin ba vizita de terrenu maka hanesan Kapital Munisipal Aileu, Liquiça, Gleno, Ainaro, Suai ho Maliana bazeia ba planu mestre rua (2) ne’ebe agora iha ona prosesu final. Planu mestre refere sei finaliza iha fulan Marsu tinan 2022. Alem de ida ne’e, bazeia ba pedido hosi Ministeriu Plano no Ordenamento, Ekipa Programa PPI mos konsege vizita fatin ba futuru barragen nian iha mota Gleno ho Railaco, Munisipiu Ermera.
Atividade vizita de terrenu iha objetivu atu hetan rezultadus, hanesan kolesaun dadus ho informasoes ligadu ho sistema be’e ho saneamento ne’ebe agora existe no mos proposta liu hosi utilizasaun software GPS, questionarius adicional ho rejistu fotografias. Alem de ida ne’e, objetivu seluk tan maka hanesan reinforsa liu tan kooperasaun entre ekipa Programa PPI ho Autoridade Munisipal no BTL iha nivel munisipiu. Hamutuk ho BTL nia asistensia teknika, ekipa Programa PPI konsege vizita be’e fontes, pontus kaptasaun, reservatorio, fatin tratamentu ho sistema be’e nian, toilet privadu ho públiku, fosa septika, to’o nia tratamentu final. Ekipa mos rejistu lokalizasaun GPS iha futuru barragen Mota Gleno ho Railaco.
La’os iha area urbana de’it, maibe lokalizasaun fasilidade existente ho proposta mos bele hetan iha area rural, foho leten, no mos area sagradu, tanba ne’e Ekipa Programa PPI tenki asegura atividade hotu-hotu atu tuir regras kulturais no tradisionais ne’ebe existe tiha ona. Ida ne’e hanesan parte ida atu fo respeitu ba komunidade lokal sira no hanesan medida seguransa ba membru ekipa hodi hala’o servisu.
Em geral, atividade ida ne’e la’o ho sucesu, positivu, no sei kontribui iha faze estudu pre-viabilidade ba fatin ne’ebe rekomenda tiha ona hosi Komisaun Internministerial Programa PPI.
Ba informasaun mais detalhu, bele kontaktu:
Mr Jan Drozdz, Lider Ekipa PPIP, jadrx(at)cowi.com
Mr Kong Kiong Mu, Koordenador PPIP, kkmux(at)cowi.com
[1] Programa Preparasaun no Implementasaun Projetus ba Timor-Leste nu’udar operasaun asisténsia téknika ida ezekuta hosi BEI ne’ebé finansia hosi Fundu Dezenvolvimentu Europeu, iha abrigu Fasilidade Investimentu ba Pasífiku nian (IFP), nomós iha abrigu Akordu Katonu nian.